Sunday 1 May 2011

ഉറുമി : Urumi

അശോക കണ്ടപ്പോഴും , അനന്തഭദ്രം സിനിമയായി കണ്ടപ്പോഴും എനിക്ക് സന്തോഷ്‌ ശിവന്‍ എന്ന സംവിധായകനെ അത്രയ്ക്ക് അങ്ങോട്ട്‌ ഇഷ്ടപ്പെട്ടിരുന്നില്ല . സുനില്‍ പരമേശ്വരന്‍ എഴുതിയ അനന്തഭദ്രം എന്ന നോവല്‍ മലയാളത്തിലെ മാന്ത്രിക നോവലുകളില്‍ ഒരു പുതിയ അനുഭവം എന്ന് തോന്നിയത് കൊണ്ടാവാം അത് സിനിമയാക്കിയപ്പോള്‍ സന്തോഷ്‌ ശിവന്‍ എന്ന സംവിധായകന്‍ ഞാന്‍ വായിച്ച ഒരു കഥയോട് ഒട്ടും നീതി കാണിച്ചില്ല എന്ന് തോന്നിയത് .

അങ്ങനെ, സന്തോഷ്‌ ശിവന്‍ എന്ന സംവിധായകനെക്കുറിച്ച്  ഒരു മുന്‍ വിധിയും കൊണ്ടാണ് പ്രിഥ്വിരാജ്  നായകനായി അഭിനയിക്കുന്ന ഉറുമി കാണാന്‍ പുറപ്പെട്ടത്‌ .

നല്ലതാണോ ചീത്തയാണോ എന്ന് അറിയണ്ട .സിനിമാ എന്ന് എഴുതി കാണിച്ചാല്‍ ക്യൂവില്‍ നമ്മള്‍ കാണും എന്നാണു കൂട്ടുകാരികളുടെ അപവാദം . എന്തായാലും 
തിയറ്ററില്‍ എത്തിയപ്പോള്‍ നല്ല തിരക്ക്. റിനോവേഷന്‍ കഴിഞ്ഞ് നല്ല ഉഗ്രന്‍ ആംബിയന്‍സ് ഉള്ളില്‍ . പടം തുടങ്ങാന്‍ പോപ്‌കോണ്‍, ഐസ്ക്രീം, മാ ജ്യൂസ്    (എല്ലാ സിനിമകള്‍ക്കും എനിക്ക് കൂട്ടുവരാന്‍  എന്റെ കൂട്ടുകാരികള്‍   ജാസ്മിനും , ശ്രുതിക്കും വേണ്ട  മിനിമം കൈക്കൂലി ) എന്നിവ റെഡി .സീറ്റില്‍ ഇരുന്ന്  പത്ത് മിനിറ്റില്‍ സിനിമ തുടങ്ങി .

അടുത്ത പത്ത് മിനിറ്റില്‍ സന്തോഷ്‌ ശിവന്‍ ആള്  ഒരുപാട് മെച്ചപ്പെട്ടല്ലോ എന്ന് തോന്നി . പിന്നെ സിനിമ മുന്നോട്ടു നീങ്ങുന്നതിനോപ്പം  സന്തോഷ്‌ ശിവന്‍ എന്ന സംവിധായകനെ എന്നിലെ പ്രേക്ഷക ഇഷ്ടപ്പെട്ട് തുടങ്ങി . ക്യാമറയുടെ കാര്യത്തില്‍ പുള്ളി പണ്ടേ സര്‍ സന്തോഷാണ് . ഇപ്പോള്‍ സംവിധാനവും അത്യാവശ്യം നന്നായി തന്നെ വഴങ്ങി തുടങ്ങി . അതിന് മനസ്സില്‍ ഒരു അഭിനന്ദനവും അറിയിച്ചു (ഇപ്പോള്‍ ബ്ലോഗിലും ) .

സിനിമ എന്ന രീതിയില്‍ ഉറുമി എനിക്ക് ഏറെ ഇഷ്ടപ്പെട്ടു.മലയാളത്തില്‍ ഇത്തരം ഒരു സിനിമ ആദ്യമാണ് എന്ന് തന്നെ പറയാം . ചരിത്രവും, ഭാവനയും ഇട കലര്‍ത്തി, സാങ്കേതിക വിദ്യകള്‍ ആളുകളെ മണ്ടന്മാരക്കാത്ത രീതിയില്‍ ഭംഗിയായി ഉപയോഗിച്ച് ചെയ്ത ഒരു സിനിമ . മേമ്പൊടിക്ക് ചിന്തിപ്പിക്കുന്ന ഒരു ചെറിയ സന്ദേശവും .

ചരിത്രം വാഴ്ത്തുന്ന വാസ്കോ ഡ ഗാമാ എന്നാ  വിദേശിയുടെ അധികമാരും അറിഞ്ഞിട്ടില്ലാത്ത മുഖവും,കഥകളും ആണ് ഉറുമിയുടെ മുഖ്യ വിഷയം .മക്കയില്‍  പോയി മടങ്ങി വന്ന കപ്പലിനെ നാന്നൂറോളം സ്ത്രീകള്‍ ,കുട്ടികള്‍ എന്നിവര്‍ ഉത്പടെ കടലില്‍ താഴ്ത്തിയ വാസ്കോയുടെ ചരിത്രത്തില്‍ , അങ്ങനെ മരിച്ച സ്ത്രീകളുടെയും ,കുട്ടികളുടെയും ശരീരത്തിലെ സ്വര്‍ണ്ണാഭരണങ്ങള്‍  ഉരുക്കി പണിയിച്ച ഉറുമിയുമായി വാസ്കോ ഡ ഗാമയെ വക വരുത്താന്‍ കാത്തിരിക്കുന്ന കേളു നയനാര്‍ എന്ന യോദ്ധാവിന്റെ സങ്കല്‍പ്പ കഥ ഇഴ ചേര്‍ത്താണ് ഉറുമി പുരോഗമിക്കുന്നത് .

ഒരല്‍പ്പം എടുത്ത് ചാട്ടം , കൂസലില്ലാത്ത യോദ്ധാവിന്റെ  ധൈര്യം, ആയുധമായി ഒരു പൊന്നുറുമി ,  പിന്നെ ഉറ്റ ചങ്ങാതിയായ വവ്വാലിയുടെ തുണ; ഇത്ര മാത്രം കൈമുതലാക്കി പീരങ്കികളും , തോക്കുകളും , വന്‍ പടയും കാവലുള്ള  ഗാമയെ കൊല്ലാന്‍ പുറപ്പെടുന്ന നായകന്‍ കേളു നയനാരായി  അഭിനയിച്ച പ്രിഥ്വിരാജിന് ഇന്നോളമുള്ള കരിയറില്‍ അഭിമാനിക്കാന്‍ ഉതകുന്ന ഒരു കഥാപാത്രമാണ് ഉറുമിയിലേത് . നടന വൈഭവങ്ങള്‍ അധികമൊന്നും ഈ കഥാപാത്രം ആവശ്യപ്പെടുന്നില്ല എങ്കിലും ,ഒരല്‍പ്പം പിഴച്ചാല്‍ കോമാളിത്തരമാകാവുന്ന രംഗങ്ങള്‍ ആവശ്യം കയ്യടക്കത്തോടെ പ്രഥ്വിരാജ് ഈ സിനിമയില്‍ അഭിനയിച്ച് ഫലിപ്പിച്ചിട്ടുണ്ട് .


കേളുവിന്‍റെ  ഉറ്റ ചങ്ങാതി വവ്വാലി എന്ന തമിഴനായി പ്രഭുദേവയും ചിത്രത്തില്‍ നിറയുന്നുണ്ട് . സംഘട്ടന രംഗങ്ങള്‍ക്ക് നല്ല ചാരുത നല്‍കാന്‍ പ്രഭുദേവയുടെ നൃത്ത പശ്ചാത്തലം സഹായിച്ചിട്ടുണ്ട് എന്നത് ഉറപ്പ്.

ഉറുമിയില്‍  എടുത്ത് പറയേണ്ട മൂന്നു കഥാപാത്രങ്ങള്‍ കൂടിയുണ്ട് . ജഗതി ശ്രീകുമാര്‍ അവതരിപ്പിച്ച കുറുപ്പ് , ജെനീലിയ അവതരിപ്പിച്ച അറക്കല്‍ ആയിഷ. അമോല്‍ ഗുപ്ത അവതരിപ്പിച്ച ചിറക്കല്‍ രാജാവ് എന്നിവര്‍ .

ജഗതി ശ്രീകുമാര്‍ ഈ ചിത്രത്തില്‍ മറ്റെല്ലാവരെയും പിന്നിലാക്കി എന്ന് പറയുന്നത് അദ്ദേഹത്തിന്‍റെ നിലവാരത്തിലുള്ള ഒരു നടന് നിസാര കാര്യമായിരിക്കാം .പക്ഷേ രംഗങ്ങളില്‍ നിന്ന് രംഗങ്ങളിലേക്ക് ചിത്രം നീങ്ങവേ കുറുപ്പ് എന്ന കഥാപാത്രത്തിന് ഉണ്ടാകുന്ന ഭാവപകര്‍ച്ചകള്‍ കാണികള്‍ക്ക് പകരാന്‍ ഇന്ന് മലയാളത്തില്‍ ഒരേ ഒരു നടനെ ഉള്ളു എന്ന് അദ്ദേഹത്തിലെ അഭിനേതാവിനെ  ഇഷ്ട്ടപ്പെടുന്നവര്‍ക്ക്  (അങ്ങനെ അല്ലാത്തവര്‍ ഉണ്ടോ ?) ധൈര്യമായി പറയാം.

ജെനീലിയ ശരിക്കും ഇന്നോളമുള്ള ആ നടിയുടെ ഇമേജ് തകര്‍ത്താണ് ഈറ്റപ്പുലി പോലെ നില്‍ക്കുന്ന അറക്കല്‍ ആയിഷ എന്ന പോരാളി രാജകുമാരിയാകുന്നത്.ചലനങ്ങളിലും ,  ശരീരഭാഷയിലും ഒക്കെ ആ വീറും, ധൈര്യവും കൊണ്ട് വന്ന് കാണികളെ അവര്‍ അത്ഭുതപ്പെടുത്തും എന്നത് തീര്‍ച്ച 


ചിറക്കല്‍ രാജാവായി അമോല്‍ ഗുപ്ത അഭിനയിക്കുമ്പോള്‍ ,അദ്ദേഹം ഒരു കേരളീയന്‍ അല്ല എന്ന് ആരും പറയില്ല . അല്ലെങ്കിലും നല്ല നടി നടന്മാര്‍ക്ക് ഭാഷയും ദേശവും ഒന്നും പ്രശ്നമല്ലല്ലോ .

മറ്റുള്ള 
അഭിനേതാക്കളില്‍ കേളുവിന്‍റെ അച്ഛന്‍ കൊത്തുവാളായി തമിഴ് നടന്‍ ആര്യ ,  ചിറയ്ക്കലെ രാജകുമാരന്‍ ഭാനുവിക്രമനായി അങ്കുര്‍ ശര്‍മ്മ, രാജകുമാരി  ബാലയായി  നിത്യാ മേനോന്‍, മാക്കംത്തറയില്‍  കേളുവും വവ്വാലിയും കണ്ടുമുട്ടുന്ന /സ്വപ്നം കാണുന്ന  പ്രവാചകയായി വിദ്യാ ബാലന്‍ എന്നിവര്‍ അവരവരുടെ കഥാപാത്രങ്ങളെ ഭംഗിയാക്കി .

വാസ്കോ ഡ ഗാമയെ അവതരിപ്പിച്ച റോബിന്‍ പ്രാറ്റ് മേക്കപ്പ് ഒക്കെ ഇട്ടു വരുമ്പോള്‍ ശരിക്കും ചരിത്ര പാഠപുസ്തകത്തില്‍ നമ്മള്‍ കണ്ടിട്ടുള്ള ഗാമ തന്നെ .അഭിനയവും നന്നായി. പക്ഷെ വിദേശി വില്ലന്മാരുടെ കൂട്ടത്തില്‍ കഥയില്‍ വസ്കോയെക്കാള്‍ നിറയുന്നത് മകന്‍ എസ്റ്റാവിയോ ഡ ഗാമയാണ് . അലക്സ് ഓനെല്‍ എന്ന നടന്‍ എസ്റ്റാവിയോയെ ഗംഭീരമാക്കിയിട്ടുമുണ്ട് 

ആധുനിക കാലത്തെ കേരളത്തില്‍ പുരാതന സംസ്കാരം ഉറങ്ങുന്ന ഒരു ഭൂമി സ്വന്തമാക്കാന്‍ ശ്രമിക്കുന്ന ഒരു വിദേശ കമ്പനിയും , യാതൊരു വിധ സാമൂഹിക ഉത്തരവാദിത്വങ്ങളും ഇല്ലാതെ ജീവിക്കുന്ന കൃഷ്ണകുമാര്‍ (പ്രിഥ്വിരാജ്) എന്ന ആ ഭൂമിയുടെ യഥാര്‍ത്ഥ അവകാശിയും, ആ ഭൂമി സംരക്ഷിക്കാനായി പോരാടുന്ന ചിലരും,അവരിലൂടെ കേരളത്തിലെ ആദ്യ വിദേശ അധിനിവേശത്തെ ചെറുത്തു പോരാടിയ സ്വന്തം പൂര്‍വ്വികരുടെ കഥ അറിയുന്ന കൃഷ്ണകുമാറില്‍ വരുന്ന മാറ്റങ്ങളുമാണ് ഉരുമിയുടെ തുടക്കവും ഒടുക്കവും . കൃഷ്ണകുമാറിന്റെ പൂര്‍വ്വികരുടെ കഥയാണ് കേളു നായനാരുടെയും അയാളുടെ പോരാട്ടങ്ങളുടെയും കഥ .

ഈ ഒരു ആഖ്യാന ശൈലിയില്‍ ഉറുമിയുടെ  തിരക്കഥ കെട്ടുറപ്പോടെ രചിക്കുന്നതില്‍  ശങ്കര്‍ രാമകൃഷ്ണന്‍ പ്രകടിപ്പിക്കുന്ന മികവ് ചിത്രത്തിന്‍റെ ഭാവത്തിനെയും, വേഗത്തിനെയും തെല്ലൊന്നുമല്ല സഹായിക്കുന്നത്. ശ്രീകര്‍ പ്രസാദിന്റെ എഡിറ്റിങ്ങും കഥക്ക് തുടര്‍ച്ചയും , വേഗതയും നല്‍കുന്നുണ്ട് .

സന്തോഷ്‌ ശിവന്റെ ക്യാമറ കണ്ണുകളിലൂടെ ഉറുമി കാണുമ്പോള്‍ മഴ പെയ്തു തോര്‍ന്ന ഒരു താഴ്വരയില്‍ നില്‍ക്കുന്ന കുളിര്‍മ കാണികള്‍ ഉണ്ടാകും .യാഥാര്‍ത്ഥ്യത്തെക്കാള്‍  ഒരു മായാലോകം ,അതാണ്‌ സന്തോഷ്‌
ശിവന്‍റെ ക്യാമറ നമുക്ക് മുന്നില്‍ തുറക്കുന്നത് .

ദീപക് ദേവിന്‍റെ സംഗീതം കോപ്പിയടിയാണ് എന്ന് പലയിടത്തും വായിച്ചു.എന്താണെങ്കിലും എനിക്ക് ഈ ചിത്രത്തിലെ പാട്ടുകള്‍ ഇഷ്ടപ്പെട്ടു . പ്രത്യേകിച്ച് ആരോ നീ ആരോ , ചലനം ചലനം എന്നീ ഗാനങ്ങള്‍ .

ഏകാ ലഖാനിയുടെ വസ്ത്രങ്ങള്‍ , രഞ്ജിത്ത് യുവയുടെ മേക്കപ്പ് എന്നിവ കഥയുടെ  ചരിത്രത്തെക്കാള്‍ നീതി പുലര്‍ത്തുന്നത് സങ്കല്‍പ്പിക കഥയോടാണ് .ചരിത്രത്തോട് നീതി പുലര്‍ത്തി
ദൃശ്യ ഭംഗി കൂടാതെ പതിനഞ്ചാം നൂറ്റാണ്ടിലെ വസ്ത്രാലങ്കാരം ചെയ്തിരുന്നുവെങ്കില്‍ ചിലപ്പോള്‍ സിനിമക്ക് എ സര്‍ട്ടിഫിക്കറ്റ് കിട്ടിയേനെ എന്നതുമാവം അതിനു കാരണം .

അനല്‍ അരസ്സു ഒരുക്കിയ സംഘട്ടന /യുദ്ധ രംഗങ്ങള്‍ ചിത്രത്തിന്‍റെ വമ്പന്‍ ചിലവിനെ ന്യായീകരിക്കുന്ന തരത്തില്‍ മികച്ച നിലവാരം പുലര്‍ത്തുന്നു.

സാങ്കേതിക വിഭാഗത്തില്‍ ഏറ്റവം ശ്രദ്ധേയമായി എനിക്ക് തോന്നിയത് ശബ്ദ സംയോജനമാണ് . ഉറുമി വെള്ളത്തിലൂടെ നിവരുമ്പോള്‍ തിയറ്ററില്‍ കേള്‍ക്കുന്ന ശബ്ദങ്ങളുടെ മിശ്രണം എന്നെ ഓര്‍മിപ്പിച്ചത് തിന്‍ റെഡ് ലൈന്‍ എന്ന ചിത്രത്തില്‍ പട്ടാളക്കാര്‍ പുല്ലിലൂടെ ഇഴഞ്ഞു നീങ്ങുന്ന രംഗത്തിലെ ശബ്ദങ്ങളുടെ കൃത്യതയാണ് . ഹോളീവുഡ് നിലവാരം എന്ന സ്ഥിരം ക്ലീഷേ അല്ല ഉദ്ദേശിച്ചത്.സാങ്കേതികമായി ഇന്നോളം ഇറങ്ങിയിട്ടുള്ള ഇതു മലയാളം ചിത്രത്തേക്കാളും ഒരു പടി മുന്നിലാണ്  ഉറുമി . അത്ര മാത്രം .

കുറവുകള്‍ ഒരു പക്ഷേ ഈ സിനിമയില്‍ ഏറെ ഉണ്ടാകാം .പക്ഷേ അവയൊന്നും കാണികള്‍ക്ക് അലോസരം ഉണ്ടാക്കുന്ന തലത്തിലേക്ക് ഉയരുന്നില്ല . അത് കൊണ്ട് തന്നെ മലയാള സിനിമയില്‍ ഇത്തരത്തിലെ ഒരു പ്രഥമ സംരഭം എന്ന നിലയില്‍ ഉറുമി പ്രശംസ അര്‍ഹിക്കുന്നു.

വ്യക്തിപരമായി , മൂന്ന് മണിക്കൂര്‍ പോയതറിയാതെ , ഒടുവില്‍ നല്ലൊരു സിനിമ കണ്ട സംതൃപ്തിയോടെ തിയറ്റര്‍ വിടാന്‍ സാധിച്ച ഒരു സിനിമ. അതാണ്‌ എനിക്ക് ഉറുമി.ഒപ്പം ഇത്തരം ഒരു വമ്പന്‍ സാഹസത്തിന് മുതിരാന്‍ മലയാള സിനിമയിലെ പുതിയ തലമുറ തയാറാകുന്നു എന്ന് അറിയുമ്പോള്‍ (പ്രിഥ്വിരാജ് ചിത്രത്തിന്‍റെ നിര്‍മ്മാണത്തില്‍ പങ്കാളിയാണ് ) ഒരു ചലചിത്ര   ആസ്വാദക എന്ന നിലയില്‍ മലയാള സിനിമയുടെ ഭാവിയെക്കുറിച്ച് നല്ലൊരു  പ്രതീക്ഷയും.

പ്രതീക്ഷിക്കാനുള്ളത്‌ ഞാന്‍ പ്രതീക്ഷിച്ചു...ബാക്കി കാലം പറയട്ടെ . 

9 comments:

  1. ഉറുമി കണ്ടിട്ടില്ല.. റിവ്യൂ നന്നായിരിക്കുന്നു.. തുടരുക..

    ReplyDelete
  2. ഈ സിനിമ കാണാനിരിക്കുന്നതേയുള്ളു. നല്ല റിവ്യൂവിനു നന്ദി.

    ReplyDelete
  3. ഈ സിനിമ കാണാനിരിക്കുന്നതേയുള്ളു. നല്ല റിവ്യൂവിനു നന്ദി.

    ReplyDelete
  4. ഒരു റിവ്യൂവര്‍ എന്നാ നിലയില്‍ പ്രിയ അഭിനന്ദനം അര്‍ഹിക്കുന്നു, പുതിയ മലയാളം സിനിമ വന്നാല്‍ ഇവിടെ വന്നു അഭിപ്രായം അറിഞ്ഞിട്ടേ പോകു, അഭിനന്ദനം പ്രിയ, കഥ മുഴുവനായി പറയുന്ന രീതി ഒഴിവാക്കിയാല്‍ ഒരു spoiler effect ഒഴിവാക്കാമായിരുന്നു

    ReplyDelete
  5. ചിത്രവിശേഷത്തിലെ ഹരീ വഴിയാണ് ഇവിടെയെത്തിയത്. ഇത്രയും സിനിമാഭ്രാന്തിയായ ഒരാളെ ഇത് വരെ കണ്ടിട്ടില്ല എന്ന സത്യം അറിയിച്ച് കൊണ്ട് എല്ലാ ഭാവുകങ്ങളും.. :)

    Follow ചെയ്യാന്‍ ഒരു ബ്ലോഗ് കൂടെ ആയി..

    ReplyDelete
  6. usually i dont follow blogs by womwn...coz they either read like cook books or talk about some serious issue in the most ridiculous way....

    read a couple of your reviews....nicely written..keep going...hope u dont lose ur interest in blogging ......

    reached here via chithravisesham....keep blogging....

    ReplyDelete
  7. btw myself a doc by profession and an amateur film maker by passion....here s the link of a short film which i had made.....

    t was screened at a couple of short film fests..here s the link.....looking forward to your opinion on it....

    http://www.youtube.com/watch?v=C9dmZZD615A

    ReplyDelete