Saturday 18 June 2011

അവന്‍ ഇവന്‍ : Avan Ivan

സേതു, നന്ദ , പിതാമഹന്‍ ഈ മൂന്ന് സിനിമകള്‍ മാത്രം മതി ബാല എന്ന സംവിധായകന്‍റെ കഴിവ് മനസിലാക്കാന്‍. പക്ഷേ നാന്‍ കടവുള്‍ എന്ന സിനിമ ഇഷ്ടപ്പെട്ടില്ല (എനിക്കല്ല.) എന്ന കാരണം പറഞ്ഞ് ബാലയുടെ പുതിയ    സിനിമയായ അവന്‍ ഇവന്‍ കാണാന്‍ വരാന്‍ മടി കാണിച്ച കൂട്ടുകാരികളെ സെന്‍റിമെന്‍റ്സ്, കാല് പിടിത്തം അങ്ങനെ പല വിദ്യകള്‍ ഇറക്കിയാണ് ഒരു വിധം തിയറ്ററില്‍ എത്തിച്ചത്. വല്ല റാ.വണ്‍ എന്നോ ഐ ഹേറ്റ് ലവ് സ്റ്റോറിസ് എന്നോ ഒക്കെ പറഞ്ഞിരുന്നെങ്കില്‍ അവളന്മാര്‍ ചാടി വീണേനെ . (നമ്മളെ പിന്നെ സിനിമ എന്ന് എഴുതി കാണിച്ചാല്‍ മതി , റെഡിയാണ്).
ട്രാജഡിയുടെ സ്പര്‍ശമുള്ള , വയലെന്‍സ്‌ കൂടുതലുള്ള സീരിയസ് വിഷയങ്ങള്‍ മാത്രം തന്‍റെ സിനിമകളുടെ കഥാതന്തുക്കളായി തിരഞ്ഞെടുത്തിരുന്ന ബാലയുടെ ആദ്യ കോമഡി സിനിമയാണ് അവന്‍ ഇവന്‍ എന്നായിരുന്നു ഈ ചിത്രത്തെക്കുറിച്ച് പുറത്തു വന്ന വാര്‍ത്തകളും , പരസ്യങ്ങളും എല്ലാം അടിവരയിട്ടു പറഞ്ഞത്. അത് കൊണ്ട് തന്നെ ഏറെ കൌതകമുണ്ടായിരുന്നു അവനെയും ഇവനെയും കാണാന്‍. ജാസ്മിന്‍റെയും , ശ്രുതിയുടെയും ഭാഷയില്‍   നാന്‍ കടവുള്‍ ഇഷ്ടപ്പെട്ട ചുരുക്കം വട്ട് കേസുകളില്‍ ഒരാളായത് കൊണ്ടും , ബാസ് എങ്കിറ ഭാസ്കരന്‍ എന്ന സിനിമ കണ്ടിട്ടുള്ളത് കൊണ്ടും, ആര്യയെ എനിക്ക് ഇഷ്ടമാണ് . വിശാലിനെ അത്രയ്ക്ക് അങ്ങോട്ട്‌ പിടുത്തമല്ല. എങ്കിലും ബാലയുടെ സിനിമയില്‍ വെറുതെ ആരെയും കാസ്റ്റ് ചെയില്ല എന്നൊരു വിശ്വാസം  ഉണ്ടായിരുന്നു.

പക്ഷേ അവന്‍ ഇവന്‍ കണ്ടു കഴിഞ്ഞപ്പോള്‍ , ബാല എന്തിനാ ഇങ്ങനെ ഒരു സിനിമ ചെയ്തത് എന്ന് തോന്നിപ്പോയി.കാസ്റ്റിംഗ് , അഭിനയം , സാങ്കേതികത ഇതിലൊന്നും അവന്‍ ഇവന്‍  മോശമല്ല. പക്ഷെ പ്രശ്നം സിനിമയുടെ തിരക്കഥയിലാണ്. സിനിമയുടെ ആദ്യ പകുതിയില്‍ പ്രത്യേകിച്ച് ഒന്നും സംഭവിക്കുന്നില്ല. കോമഡിക്ക്   വേണ്ടി കൂറേ സീനുകള്‍ കൂട്ടി ചേര്‍ത്ത ആദ്യ പകുതി . രണ്ടാം പകുതിയില്‍ ഒരു വില്ലന്‍റെ അവതരണവും , ക്ലൈമാക്സും . രണ്ടേകാല്‍ മണിക്കൂറില്‍ താഴെ മാത്രമേ  സിനിമക്ക് നീളമുളെളങ്കില്‍ പോലും ചില ഭാഗങ്ങളില്‍ ഒക്കെ വല്ലാത്ത മുഷിച്ചില്‍ തോന്നി. നല്ലത് പോലെ അവതരിപ്പിച്ചു കൊണ്ട് വരുന്ന കഥാപാത്രങ്ങള്‍ പലതും ഇടയ്ക്ക് പെട്ടെന്ന് കാണാതാവുന്ന ഒരു ഫീല്‍ കൂടിയാകുമ്പോള്‍ , ഗൌരവമുള്ള ഒരു തിരക്കഥ ഈ സിനിമക്ക് വേണ്ടി ബാല ഒരുക്കിയിരുന്നോ എന്ന സംശയവും ബാക്കി.

അഭിനയത്തില്‍, വിശാല്‍ വാള്‍ട്ടര്‍ വണങ്കാമുടി എന്നാ വാള്‍ട്ടറായ് തന്‍റെ കരിയറിലെ ഏറ്റവും മികച്ച വേഷമാണ് അവന്‍ ഇവനില്‍ ചെയ്യുന്നത്. അഭിനയത്തിലും , നാടകത്തിലുമൊക്കെ കമ്പമുള്ള കോങ്കണ്ണന്‍ അയ വാള്‍ട്ടര്‍ എന്ന കഥാപാത്രത്തെ വളരെ നന്നായി തന്നെ വിശാല്‍ അവതരിപ്പിച്ചിട്ടുണ്ട് . വാള്‍ട്ടറിന്‍റെ അര്‍ദ്ധ സഹോദരനായ കുമ്പിടറേന്‍ സാമി എന്ന സാമിയായി ആര്യക്ക്  വിശാലിന് പറ്റിയ ഒരു സഹനടന്‍ ആവുക എന്നതിലുപരി  ഈ ചിത്രത്തില്‍ ഏറെയൊന്നും ചെയ്യാനില്ല. പക്ഷേ വിശാലുമായുള്ള  സീനുകളില്‍ ചിലതിലൊക്കെ ആര്യ നന്നായിട്ടുണ്ട്. കൂടാതെ തേന്മൊഴി (മധുശാലിനി ) എന്ന നായികാ കഥാപാത്രവുമായുള്ള രംഗങ്ങളിലും. മറ്റു നടീ നടന്മാരില്‍ ഏറ്റവും നന്നായത് ഹൈനെസ് എന്ന കഥാപാത്രത്തെ അവതരിപ്പിച്ച ജി  എം കുമാറാണ് . പ്രതാപമെല്ലാം നഷ്ടപ്പെട്ട പഴയ നാട്ടുരാജാവായ, വാള്‍ട്ടര്‍ , സ്വാമി എന്നിവരെ ഏറെ സ്നേഹിക്കുന്ന , നാട്ടുകാരുടെയെല്ലാം ബഹുമാനത്തിന് പത്രമായ ഹൈനെസ് എന്ന കഥാപാത്രത്തെ ജി എം കുമാര്‍ കാണികളുടെ മനസ്സില്‍ നില്‍ക്കും വിധം അവതരിപ്പിച്ചിട്ടുണ്ട്. കോമഡി ആകട്ടെ , സെന്റിമെന്റ്സ് ആകട്ടെ , ഇവയിലെല്ലാം നല്ല കയ്യടക്കം വന്ന അഭിനയം.ഹൈനെസ്സില്‍ ബാലയുടെ മിഴിവുറ്റ കഥാപാത്രങ്ങളെ സൃഷ്ടിക്കുന്നതിലുള്ള കഴിവുകളും തെളിഞ്ഞ് കാണാം
അനധികൃതമായി  പശുക്കളെ കടത്തുന്ന വില്ലനായി ആര്‍ കെ  ബാലയുടെ മുന്‍കാല ചിത്രങ്ങളിലെ വില്ലന്മാരുടെ (പിതാമഹനില്‍ രാജ്കുമാര്‍, നാന്‍ കടവുളില്‍ രാജേന്ദ്രന്‍ ) നിഴല്‍ പോലുമാകുന്നില്ല .

നായികാ  കഥാപാത്രങ്ങളില്‍ ജനനി അയ്യരുടെ ബേബി എന്ന പോലീസുകാരിക്കോ (വിശാലിന്‍റെ നായിക), മധുശാലിനിയുടെ  തേന്‍മൊഴി എന്ന കോളേജ് വിദ്ധ്യാര്‍ത്ഥിനിക്കോ (ആര്യയുടെ നായിക) ചില്ലറ കോമഡി രംഗങ്ങള്‍ക്ക് വഴിയൊരുക്കുക എന്നല്ലാതെ മറ്റൊന്നും ചെയ്യാനില്ല . വിശാലിന്‍റെ അമ്മയായി അംമ്പിക   , ആര്യയുടെ അമ്മയായി ജയപ്രഭ എന്നിവരുടെ കഥാപാത്രങ്ങളെ കാണികള്‍ക്ക് പരിചയപ്പെടുത്തുന്നത് ‌ ശക്തമായ കഥാപാത്രങ്ങളായി വികാസം പ്രാപിക്കാനുള്ള എല്ലാ സാദ്ധ്യതകളോടും  കൂടിയാണ്. പക്ഷേ സിനിമയുടെ അവസാനത്തോട് അടുക്കുമ്പോള്‍  അവരുടെ കഥാപാത്രങ്ങള്‍ എവിടെ പോയി എന്ന് തോന്നി പോകും . പിതാമഹനില്‍ സംഗീത , നാന്‍ കടവുളില്‍ പൂജ  എന്നിവരുടെ കഥാപാത്രങ്ങളും , നന്ദയില്‍ നായകന്‍റെ അമ്മയുടെ കഥാപാത്രവും ഒക്കെ സൃഷ്ടിച്ച ബാലക്ക് ഇത് എന്ത് പറ്റി  എന്ന സംശയം തിയറ്റര്‍ വിട്ടപ്പോഴും എനിക്കുണ്ടായിരുന്നു.

ജാസ്മിനും ,ശ്രുതിയും അവന്‍ ഇവന്‍ ശരിക്കും സഹിച്ചിരുന്നു കാണുകയായിരുന്നു എന്നാണ് പറഞ്ഞത്. അത്രയ്ക്ക് കുഴപ്പം ഒന്നുമില്ല എന്ന് ഞാന്‍ അവരോട് വഴക്കിട്ടു. എങ്കിലും ചില  കുഴപ്പങ്ങള്‍ ഉണ്ട് എന്ന് സ്വയം സമ്മതിക്കുകയും ചെയ്തു (അവരോടു പറഞ്ഞില്ല). നല്ല വശങ്ങളും ഉണ്ട് ഈ സിനിമയില്‍.
നല്ലത് എന്ന് എനിക്ക് തോന്നിയതില്‍ ചിലത്:

  • നേരത്തെ പറഞ്ഞത് പോലെ ഹൈനെസ്സ് എന്ന കഥാപാത്രം.
  • വിശാലിന്റെ ചില സീനുകള്‍. ഉദാഹരണത്തിന് , സ്റ്റേജില്‍  നടന്‍ സൂര്യക്ക്  മുന്നിലെ നവരസ പ്രകടനം. ജഗതി ഇതേ രസങ്ങള്‍ കൂടുതല്‍ ഭംഗിയായി ഉദയനാണ് താരത്തില്‍ കാണിച്ചിട്ടുണ്ട് എന്ന് ജാസ്മിന്‍ .പക്ഷെ ജഗതി എവിടെ വിശാല്‍ എവിടെ എന്ന് ചിന്തിക്കുമ്പോള്‍ , വിശാലിന് ഒരു കൈയ്യടി ഒക്കെ കൊടുക്കാം 
  • വിശാല്‍ ,ആര്യ   എന്നിവരുടെ കഥാപാത്രങ്ങള്‍ തമ്മിലുള്ള കെമിസ്ട്രി ചില സീനുകളില്‍ ഏറെ രസകരമാണ് 
  • ഹൈനെസ്സുമായി തേന്മൊഴിയുടെ പേരില്‍ വഴക്കുണ്ടാക്കിയ ശേഷമുള്ള പാട്ടില്‍ സ്വാമിയുടെ പശ്ചാത്താപം വ്യക്തമാക്കുന്ന  സീന്‍ . 
  • ചില സംഭാഷണങ്ങള്‍ ശരിക്കും ചിരി ഉണര്‍ത്തും .വാള്‍ട്ടര്‍ ബേബിയുടെ വീട്ടില്‍ മോഷ്ട്ടിക്കാന്‍   കയറുന്ന രംഗം ഉദാഹരണം
  • ആര്‍തര്‍ വിത്സന്റെ ക്യാമറ . ശരിക്കും ഉഗ്രന്‍ . 
  • സംഘട്ടനം . അത് അല്ലെങ്കിലും ബാലയുടെ സ്പെഷ്യാലിറ്റിയാണ് എന്ന് എനിക്ക് തോന്നിയിട്ടുണ്ട് 
ഇനി അത്ര നല്ലതല്ല എന്ന് തോന്നിയവ:
  • വാള്‍ട്ടര്‍ എന്ന    കഥാപാത്രത്തിന്റെ കലയോടുള്ള അഭിനിവേശം , ആരാലും അംഗീകരിക്ക പെടാത്തതിലുള്ള വിഷമം ഇതൊന്നും കഥയിലൊരിടത്തും കാണികളുടെ മനസ്സില്‍ പതിയുന്ന രീതിയില്‍ അവതരിപ്പിക്കപ്പെടുന്നില്ല .അങ്ങനെ ചെയ്തിരുന്നെങ്കില്‍ , സ്റ്റേജില്‍ നവ രസങ്ങള്‍ അവതരിപ്പിച്ച ശേഷം സൂര്യ അഭിനന്ദിക്കുമ്പോള്‍ വാള്‍ട്ടറിന്‍റെ  പ്രതികരണം കൂറെ കൂടി ഗംഭീരമായി കാണികള്‍ക്ക് അനുഭവപ്പെട്ടേനെ എന്ന് എനിക്ക് തോന്നി 
  • വളരെ ഗംഭീരമായി അവതരിപ്പിക്കപ്പെടുന്ന കഥാപാത്രങ്ങളുടെ പരിണാമം തീരെ ദുര്‍ബലമാകുന്നു എന്നൊരു പോരയ്മ ചിത്രത്തില്‍ ഉടനീളമുണ്ട് .ഉദാഹരണത്തിന്  ആര്‍ കെയുടെ വില്ലനെ ആദ്യമായി സ്ക്രീനില്‍ കാണിക്കുന്ന സീന്‍  വളരെ മെച്ചപ്പെട്ട നിലവാരത്തിലുള്ളതാണ്.പക്ഷേ അതിനു ശേഷം ആ കഥാപാത്രം ഒന്നുമല്ലാതായി തീരുന്നത് പോലെ തോന്നി.അത് തന്നെ അംമ്പികയുടെയും ,ജയപ്രഭയുടെയും കഥാപാത്രങ്ങളുടെ കാര്യത്തിലും സംഭവിക്കുന്നു.
  • തീരെ ദുര്‍ബലമായ ഒരു തിരക്കഥ 
  • ഹൈനസുമായി കള്ള് കുടിക്കുന്ന സീനില്‍ ആര്യയുടെ അഭിനയം. കോമഡിക്ക് വേണ്ടി വലിച്ചു നീട്ടി വിരസമാക്കിയ ഒരു രംഗമാണ് അത് . 
  • യുവന്‍ ശങ്കര്‍ രാജയുടെ സംഗീതം .പാട്ടുകള്‍ ഒന്നും കൊള്ളില്ല . പശ്ചാത്തല സംഗീതം പലപ്പോഴും പിതാമഹനെ ഓര്‍മ്മിപ്പിക്കുകയും ചെയ്തു .
  • ക്ലൈമാക്സ് ചിത്രികരിച്ച രീതി കാണുമ്പൊള്‍ പിതാമഹന്‍ ,നാന്‍ കടവുള്‍ എന്നീ ചിത്രങ്ങളുടെ ക്ലൈമാക്സ് കൂട്ടി കുഴച്ച ഒരു പ്രതീതി  
ചുരുക്കത്തില്‍ സ്ഥിരം രീതികളില്‍ നിന്ന് മാറി ഒരു സിനിമ ചെയ്യണം എന്ന വാശിയില്‍ ബാല സംവിധാനം ചെയ്ത സിനിമയാണ് അവന്‍ ഇവന്‍ എന്ന് തോന്നുന്നു. ഒരേ ചട്ടക്കൂടില്‍ ഒതുങ്ങരുത് എന്ന ചിന്ത  നല്ലതാണ്. പക്ഷെ ബാലയെ പോലൊരു സംവിധായകന്‍  സ്ഥിരം രീതികളില്‍ നിന്ന് മാറി ഒരു സിനിമ ചെയുമ്പോള്‍, ആ സിനിമയില്‍ ബാലയെ ഇഷ്ടമുള്ള പ്രേക്ഷകര്‍ വെയ്ക്കുന്ന പ്രതീക്ഷയും വളരെ വലുതാവും (എന്റെ കാര്യത്തിലെങ്കിലും ). നിര്‍ഭാഗ്യത്തിന് ബാലയുടെ ഈ സംരംഭം എന്നെ നിരാശപ്പെടുത്തി. അവിടിവിടെ കാണികളെ രസിപ്പിക്കുമെങ്കിലും , ആകെ തുക നോക്കുമ്പോള്‍ അവനും ഇവനും അത്ര പോരാ. 

3 comments:

  1. ഞാന്‍ കടവുള്‍ ഒരു നല്ല സിനിമ ആയിരുന്നു. ബാലാ യുടെ ഇത് വരെ ഉള്ള പടങ്ങള്‍ എല്ലാം എനിക്ക് വളരെ ഇഷ്ടമാണ്. ഞാനും സിനിമ എന്ന് എഴുതി കാണിച്ചാല്‍ ചാടി കയറി പോകുന്ന ടൈപ്പ് ആണ്. പക്ഷെ ഇവിടെ (COLOMBO ) മലയാളം പടങ്ങള്‍ ഒന്നും വരില്ല . തമിഴും ഹിന്ദിയും ഇവിടെ കാണാം. ഇവിടെ അവന്‍ ഇവന്‍ റിലീസ് ചെയ്തിട്ട്ടില്ല . ഒറിജിനല്‍ ഡി വി ഡി വരുമ്പോള്‍ കാണണം. പിന്നെ ഞാന്‍ കടവുള്‍ ഇഷ്ടപ്പെടതവരെ സമ്മതിക്കണം. ദയ വധത്തെ അനുകൂലിക്കുന്നു എന്നതല്ലാതെ ഒരു പ്രശ്നവും അതിനില്ല .

    ReplyDelete
  2. .പക്ഷെ ജഗതി എവിടെ വിശാല്‍ എവിടെ എന്ന് ചിന്തിക്കുമ്പോള്‍ , വിശാലിന് ഒരു കൈയ്യടി ഒക്കെ കൊടുക്കാം - Sorry maam, dont understand why each and every Malayaalee is comparing this scene with that of Jagathi.
    Almost all Indian art forms have its own depiction of the navarasas. Depending on the artist, the way this is demonstrated can easily change, like in the case of a Kathakali actor (which is the kind Jagathy tried)who will do it with minimum movement of the body other than face. A Koodiyaattam actor would do this even differently and as the artist turns out more less classic and more folk, the body movements would vary. It is really too much to demand every artist should perform the navarasas in the same way. Walter (Vishal) is not classic at all, even if not mentioned, he can be easily taken as a rustic artist doing some folk based performances. So what he has depicted, is exactly fine looking at his back ground. Even if it was Jagathy who have done Vishal's role, he would have tried to do it in a more animated fashion than in Udayanaanu Thaaram. (In case the same Walter had done Navaras in the classic way, I am sure, we Malayaaleess would have criticezed that - how can a kuthu dancer do kathakali expressions)
    It is really sad that we really try to look down upon anything from Tamil, until it gets a national award. I still remember how some Malayaalees used to say Vikram's performance in Pithamahan and Sethu were horrible over acting,until they were silenced by the n.award.

    Bala disappointed as a writer. But scene by scene, he is still a great director. Its not like a typical average movie, where you wont remember anything once you are out of the theatre. Many scenes from Avan Ivan are still fresh, long after the movie.

    ReplyDelete